Badminton – niðurröðun á Unglingamóti TBS

Hér má sjá niðurröðun leikja á Unglingamóti TBS í badminton ásamt tímasetningu þeirra:  https://www.tournamentsoftware.com/sport/tournament.aspx?id=42C0CAE6-17AC-41B9-BDCE-13875EE02DEF 

Ég vil minna iðkendur og foreldra á að mæta tímanlega, vera með gott nesti og drykkjarföng, íþróttaföt, íþróttaskó og badmintonspaða 🙂 Ef eitthvað er óljóst má hafa samband við mig í síma 659 1334. Sjáumst á laugardaginn! 

Ivalu Birna

 

Badminton – Unglingamót TBS

Unglingamót TBS 😊

Helgina 29. – 30. september mun Tennis og Badmintonfélag Siglufjarðar halda hið árlega Unglingamót TBS. Keppt verður í aldursflokkum U9 – U19 í einliða-, tvíliða- og tvenndarleik og hefst keppni stundvíslega kl. 09:00 á bæði laugardag og sunnudag. Keppnisgjöld eru eftirfarandi:

                                            Einliðaleikur: 2.000 ,-

                                            Tvíliðaleikur: 1.500 ,-

                                            Tvenndarleikur: 1.500 ,-

Á næstu æfingu, miðvikudaginn 12. september, mun Ivalu kynna mótið fyrir badmintoniðkendum Samherja og athuga hvort áhugi sé fyrir hendi, að auki munu krakkarnir fá miða með sér heim sem inniheldur helstu upplýsingar um mótið. Ef tekin er ákvörðun um að fara á mótið er vonandi vel mögulegt að sameina í bíla á Siglufjörð auk þess sem gott væri að fá nokkra foreldra og/eða forráðamenn til að slást í hópinn, nánar um það síðar.

Skráningar sendist á netfangið ivalufalck@gmail.com eða í síma 659 1334 í síðasta lagi föstudaginn 21. september. Einnig er velkomið að hafa samband í fyrrnefnt netfang eða símanúmer fyrir frekari upplýsingar eða ef eitthvað er óljóst.

Íþróttaskóli 2-5 ára

Íþróttaskóli Umf. Samherja byrjar laugardaginn 29. September. Íþróttaskólinn er fyrir börn á aldrinum 2-5 ára og er settur upp í leikja- og þrautabrautarformi þar sem foreldrar taka virkan þátt og fylgja sínu barni eftir. 

Íþróttaskólinn verður samtals sex skipti þetta haustið: 29.09., 06.10., 13.10., 27.10., 03.11. og 10.11 frá kl. 9:15-10:00 Mikilvægt er að börnin komi í þægilegum fötum og gert er ráð fyrir að þau verði berfætt.  Kostnaður er 3.000 kr. fyrir barn og er skráning á netfang Ungmennafélagsins, samherjar@samherjar.is, þar sem fram þarf að koma fullt nafn og kennitala barns og forráðamanns ásamt símanúmeri.  Umsjón með Íþróttaskólanum hefur Sonja Magnúsdóttir. 

Sjáumst í íþróttahúsinu 🙂

Vel heppnuð sprett-þraut

Góð þátttaka var í sprett-þríþrautarkeppni, sem haldin var í og við íþróttamiðstöðina í dag. Keppnin var samstarfsverkefni UMF Samherja, íþróttamiðstöðvar og Þríþrautarfélags Norðurlands og var ekki annað að heyra á keppendum en ánægju með fyrirkomulag og alla umgjörð. Þátttökugjald rann óskipt til UMF Samherja en samstarfsaðilar binda vonir við að þetta geti orðið árlegur viðburður. Sjálfboðaliðar ungmennafélagsins stóðu sig að vonum vel og eiga þeir þakkir skildar 🙂 

Mótahelgin mikla!

Iðkendur UMF Samherja höfðu í nógu að snúast sl. helgi. 

Akureyrarmót í frjálsum íþróttum fór fram á Þórsvelli sl. laugardag og voru þar mætt til leiks hópur barna 8 ára og yngri.  

Á Árskógsströnd fór fram hið árlega Strandarmót en þar átti ungmennafélagið að sjálfsögðu lið – í fleirtölu 😉  6. og 8. flokkur kepptu á laugardaginn en 7. flokkur á sunnudaginn.  

Norðurlandsmótið í frisbígolfi var líka haldið um helgina en þar átti við flottan fulltrúa.  Trausti Freyr lenti í 2. sæti í undir 15 ára flokki eftir tap í bráðabana um sigurinn.

Eins og sést stóðu allir iðkendur sig með prýði þessa mótahelgi og var gleðin að sjálfsögðu við völd 🙂 

Trausti Freyr ásamt öðrum keppendum
Kátir krakkar í 6. flokki

Sigurreifir strákar í 7. flokki

Flottir frjálsíþróttakrakkar