Æfingabúðir í Borðtennis – laugardaginn 17. nóvember

 

Laugardaginn 17. nóvember verða æfingabúðir í borðtennis í íþróttamiðstöðinni við Hrafnagil.

Umsjónarmaður og aðalþjálfari búðanna er Bjarni Þorgeir Bjarnason en hann hefur numið þjálfarafræðin á meistarastigi í háskólanum í Split í Króatíu. Æfingabúðirnar eru ætlaðar byrjendum jafnt sem lengra komnum og eru jafnt fyrir fullorðna og börn.

Þeir sem koma lengra að og vilja fá gistingu hjá okkur eru beðnir að hafa samband ekki síðar en á fimmtudag. Það er einnig gott fyrir þátttakendur að hugsa fyrir nesti þótt það verði einhver veitingasala á staðnum.

Æfingabúðirnar hefjast klukkan 10 og standa fram eftir degi / fram á kvöld. Þátttökugjald er 1.000 krónur sem greiðist við komu. Það er ágætt að fá skráningar á netfangið sigeiriks@gmail.com eða í síma 862-2181. En ef menn gleyma að senda skráningu er hægt að taka við slíkri á staðnum.

 

Borðtennisvörur frá Pingpong.is

Við vekjum einnig athygli á því að Sigurður V. Sverrisson verður á staðnum þennan dag með borðtennisvörur en hann rekur verslunina pingpong.is. sem er eina borðtennisverslun landsins. Það eru nokkrir iðkendur sem vantar betri borðtennisspaða og nú er dauðafæri að velja slíkan.

Ferðastyrkir UMSE

Þann 30. september rennur út umsóknarfrestur um ferðastyrki UMSE vegna ársins 2018. Styrkirnir ná til eftirfarandi verkefna skv. 5. grein vinnureglna stjórnar UMSE um ferðastyrki:

“a. Keppnisferðir og sýningar erlendis.
b. Æfingaferðir erlendis.
c. Keppnisferðir og sýningar innanlands.
d. Æfingaferða innanlands.
e. Æfinga og keppnisferðir á vegum sérsambanda, s.s. landsliðsverkefni, æfingar með úrvals eða afrekshópum (og öðrum sambærilegum verkefnum).”

Umsóknareyðublöð og nánari upplýsingar eru á www.umse.is .

Þeir iðkendur Umf. Samherjar sem eiga rétt á úthlutun úr sjóðnum eru hvattir til að nýta sér það.

Að loknu Íslandsmóti unglinga í borðtennis.

Um helgina fengum við marga góða gesti á Íslandsmót unglinga í borðtennis.  Það voru rúmlega 80 keppendur og af þeim gisti um helmingur í Hrafnagilsskóla.  Samherjar voru með 14 keppendur á mótinu.  Hér gefur að líta uppröðun í salinn fyrri keppnisdaginn.

Uppröðun á fyrri keppnisdegi. Níu borð sem voru virk frá klukkan tíu að morgni til hálf sjö um kvöldið.

Verðlaunagripir Norðurlands sáu um verðlaunin á mótinu og voru þau sérstaklega glæsileg.

Í borðtennis er yfirleitt ekki spilað um 3. sætið heldur fá þeir sem tapa í undanúrslitum viðurkenningu fyrir að hafa lent í 3. – 4. sæti.

Jonas Björk var í mótsstjórn fyrir hönd Umf. Samherjar og ásamt honum voru Starri Heiðmarsson fyrir Æskuna og Helgi Þór Gunnarsson fyrir Akur.  Að öðrum ólöstuðum var Jonas sá albesti mótsstjóri sem hægt hefði verið að hugsa sér.  “Við” ákváðum fljótlega að læra vel á hugbúnaðinn (Jonas) og reyna að keyra mótið á annan hátt en hingað til hafði verið gert.  Blanda saman ólíkum leikjum og aldursflokkum fyrri keppnisdaginn og reyna að hafa hrein úrslit þann síðari.  Þessi áætlun gekk upp.

Hér koma nokkrar myndir af mótinu af handahófi.

Keppendur okkar stóðu sig allir vel.  Voru kurteis og komu vel fyrir.  Lögðu sig fram og ég held að enginn hafi farið í gegn um mótið án þess að vinna að minnsta kosti eina lotu.  En margir voru að keppa í fyrsta skipti á stóru móti.  Það er skoðun okkar þjálfaranna að sumir stærstu sigrarnir hafi mögulega unnist án þess að vera verðlaunaðir með bikurum og verðlaunapeningum.  Og þetta er skrifað alveg án þess að kasta rýrð á þau stóru afrek.

Samherjar unnu til nokkurra verðlauna á mótinu og telst okkur til að af þessum fjórtán þátttakendum hafi átta unnið til verðlauna en verðlaun eru aðeins veitt fyrir fyrstu 4 sætin eins og áður sagði.

Heiðmar var þarna stórtækastur og er þrefaldur Íslandsmeistari í sínum aldursflokki.  Eða í einliðaleik, tvíliðaleik og tvenndarkeppni.

Hildur varð Íslandsmeistari í einliðaleik og tvenndarkeppni og er þetta hennar fyrsti Íslandsmeistaratitill í einliðaleik.

 

Úlfur varð Íslandsmeistari í tvíliðaleik og varð í öðru sæti í tvenndarkeppni.

Trausti Freyr varð í 2. sæti í tvíliðaleik ásamt Jasups Meckl hjá Akri og þeir félagarnir deildu einnig 3. – 4. sæti í einliðaleik.

Sara Dögg Sindradóttir varð í 2. sæti í einliðaleik.

Lilja Óskarsdóttir varð í 3. – 4. sæti í einliðaleik.

Margrét Dana Þórsdóttir varð í 3.-4. sæti í tvíliðaleik ásamt stúlku frá KR.

Sólveig Kristinsdóttir varð í 3.-4. sæti í tvenndarkeppni með honum Ingó hjá Akri.

Ég held að ég sé ekki að gleyma neinum verðlaunahafa en eins og áður sagði þá voru stórir sigrar einnig unnir án viðurkenninga í formi peninga og bikara.  Þau Ronja Sif Björk, Akvelina Darta Bruvere, Anna Keita Eksteine, Aksels Rojs Eksteins, Hlynur Snær Elmarsson og Gabriela Rimkute voru bæði félaginu og sjálfum sér til sóma. Þau eiga það öll sameiginlegt að hafa byrjað að æfa borðtennis síðasta haust. Krakkarnir eiga því eftir að fá næg tækifæri til að nýta reynsluna úr þessu móti. Það var stórkostlega gaman að sjá hvað iðkendur bættu sig þegar á mótið leið og hvað sumir nýliðarnir fengu mörg stig gegn þeim bestu þó leikir ynnust ekki.  Hér koma nokkrar myndir af verðlaunahöfum frá í dag en það vantaði marga af okkar fólki vegna frjálsíþróttamóts og veisluhalda.

Hópmynd eftir að verðlaunaafhendingu lauk. Því miður voru margir fjarverandi en keppendur voru sem áður sagði liðlega 80.
Þetta eru brautryðjendurnir okkar ásamt þjálfurum. Það má segja að borðtennisstarfið hafi farið af stað fyrir alvöru í hópferð í TBR húsið á Íslandsmót unglinga fyrir nokkrum árum þegar þessi öll voru í yngsta flokknum. Þau eru góðar fyrirmyndir, dugleg að leiðbeina hinum yngri og áhugasöm um að bæta sig á allan máta.
Eins og sést var bara helmingur þátttakenda okkar viðstaddur verðlaunaafhendingu í dag. En þetta er myndarhópur, bæði þessi sjö og hin sjö sem voru fjarri.

 

Við getum svo ekki skilið við þessa umfjöllun án þess að minnast aðeins á fyrirkomulag og samvinnu.  Við fengum frábæran matreiðslumann til þess að sjá um morgunverð og aðrar máltíðir.  Allir yfir sig ánægði með það.  Við vorum með veitingasölu sem foreldrar og fjölskyldur þeirra hjálpuðust að við að starfrækja. Það var talsverð vinna en nauðsynleg og skilaði fjármunum í ferðasjóð iðkenda.  Vöfflurnar hjá Hrund voru stórkostlegar og Aldís Lilja tók að sér skrifstofustjórn, innheimtu félagsgjalda og sölu á matar- og gisti armböndum.   Ýmsir fleiri lögðu mikið til og vart hægt að telja þá upp hér því einhverjir yrðu áreiðanlega útundan.

Eyjafjarðarsveit lagði okkur til sundlaugina á laugardagskvöldið fyrir sundlaugarpartí og var það bæði afskaplega rausnarlegt og vinsælt.  Elstu krakkarnir okkar sáu um músíkina og var að þessu gerður góður rómur.  Samherjar aðstoðuðu við gæslu og var þetta svona eins og foreldravaktin þar sem við gengum fram og aftur um útisvæðið og nutum hljómlistarinnar.  Enn nokkrar myndir.

Eftir þessa yfirferð má ég til með að minnast á litlu kraftaverkin sem allt í einu gerast og allt smellur.  Þegar mótið var að fara af stað og allt í kaos kom Gunnur Ýr og spurði hvað hún gæti gert.  Því var fljótsvarað – hjálpa til í mótsstjórn.  Síðan sá hún um að kalla upp alla leiki mótsins, finna dómara og vinna með Jónasi við skipulag og úrvinnslu.  Síðan birtist Harpa seinnipart dags og bættist í aðstoðina og hún endaði mótið á því að lesa upp verðlaunahafa eins og atvinnumaður í útvarpi.

Jonas setti úrslit jafnóðum á netið og því var hægt að fylgjast með öllu sem gerðist nánast jafnóðum og Borðtennissambandið var einnig með YouTube útsendingu nánast allan sunnudaginn og hluta laugardags.  Þær er enn hægt að sjá á rás BTÍ.

Við borðtennisþjálfarar Umf. Samherjar erum nánast klökkir yfir árangri helgarinnar.  Bæði styrkleika okkar keppenda en ekki síður styrkleika samfélagsins, foreldranna og annarra sem að komu.  Starfsfólk sundlaugarinnar fékk alveg að snúast aukahringi um helgina og hafa þau sjálfsagt farið dauðþreytt heim núna í lok dags.  En við erum einnig djúpt snortnir yfir ánægju allra gestanna okkar með mótið, aðstöðuna, matinn og helgina yfirleitt.  Það virðist hafa gengið upp sem stefnt var að.  Að búa til borðtennishelgi sem skilur eftir sig góðar minningar, hvort sem sigrar unnust við borðin eða ekki.

Takk öll

Ólafur Ingi Sigurðsson
Sigurður Eiríksson

(Svo förum við auðvitað í góða hópferð á Íslandsmót unglinga 2019, hvar svo sem það verður haldið.)

 

 

Íslandsmót unglinga í borðtennis 2018

Um helgina höldum við Íslandsmót unglinga í borðtennis. Laugardag kl. 10 byrja yngstu krakkarnir að spila og hálftíma síðar þeir eldri. Út laugardaginn verður spilað og spilað og spilað og má sjá dagskrána með því að fletta upp mótinu á www.tournamentsoftware.com eða með því að smella á þennan hlekk .
Hér koma líka úrslit inn eftir því sem líður á mótið en því lýkur á sunnudag.

Á laugardagskvöldið, milli klukkan 20 og 22 verður sundlaugardiskó á vegum mótsins og allir Samherjar velkomnir og fjölskyldur þeirra.

Foreldrar borðtennisiðkenda standa fyrir veitingasölu báða dagana – og einhverjir fleiri hjálpa til. Það verður því bæði hægt að líta við og sjá meistaratakta í borðtennis og einnig að fá sér ljúffengt miðdegiskaffi og meððí.
Sjáumst í íþróttahúsinu á borðtennisveislu ársins – á Norðurlandi að minnsta kosti.

Borðtenniskennsla – skylduáhorf iðkenda á öllum aldri.

Þetta efni er á Facebook síðu borðtennis hjá Samherjum en margir iðkendur eru ekki með aldur til að vera þar. Set því inn hlekk hérna vegna fjölda áskorana. Allt á ensku en skýrt og mikilvægt. Horfið á þetta – jafnvel aftur og aftur – foreldrar líka. Svo er bara að tileinka sér rétta líkamsstöðu og hreyfingar. Vera dugleg á æfingum og “slá í gegn”.

Joze Urh – Impact of Footwork and Balance On Making Contact With The Ball, Part 1-4

Samherjagallar – UMSE gallar. Mátun um helgina.

Um helgina verður mátunarsett á göllum á æfingum hjá Samherjum.  Um er að ræða svokallaða UMSE galla sem eru sameiginlegir fyrir öll félög innan UMSE.  Gallarnir eru af Hummel gerð og eru niðurgreiddir af UMSE.  Hver galli kemur með Samherjamerki á vinstri framhlið og UMSE merki á upphandlegg.

Hægt er að kaupa staka rennda jakka og stakar buxur en auk þess mjög ódýra galla fyrir börn.  Mátun var einnig á borðtennismótinu um daginn en þá vantaði allmikið af því sem í boði er.

Gallarnir verða til mátunar í badmintontíma á föstudag, miniton og badminton á laugardag og borðtennistíma á sunnudag.

Sigurður Eiríksson gefur nánari upplýsingar í pósti sigeiriks@gmail.com